नेहा नारखेडे

"बिग डेटा अनालिटिक्स" शिकवत असताना "अपाचे काफका" नावाच्या सॉफ्टवेअरची माहिती मिळाली. त्याचा वापर बहुतांश कंपन्या करतात. त्यामुळे मी देखील ते शिकायला सुरुवात केली. कोणतीही गोष्ट शिकण्याच्या आधी त्यामागचा इतिहास काय आहे? हे जाणून घेण्याचा मी नेहमी प्रयत्न करत असतो. अशाच प्रकारे "अपाचे काफका"चा इतिहास देखील जाणून घेतला. इसवी सन २०११ मध्ये तीन संगणक विकसकांनी हे सॉफ्टवेअर विकसित केले होते. त्यातील एक मराठी नाव आढळून आले.... नेहा नारखेडे.
संगणक तंत्रज्ञानातील अतिशय मोजक्या मराठी नावांपैकी हे एक नाव होय. माझी उत्सुकता चाळवली गेल्यामुळे मी नेहा नारखेडे विषयी अधिक शोधण्याचा प्रयत्न केला आणि आश्चर्यजनक माहिती समजली. नेहा नारखेडे हिने सन २००६ मध्ये पुण्याच्या "पुणे इन्स्टिट्यूट ऑफ कॉम्प्युटर टेक्नोलॉजी" अर्थात पीआयसीटी मधून संगणक अभियांत्रिकीची पदवी घेतली आहे. लिंक्डइन या कंपनीमध्ये काम करत असताना तिच्या अन्य दोन सहकाऱ्यांच्या मदतीने तिने "अपाचे काफका" विकसित केले. सन २०१४ मध्ये अमेरिकेच्या पालो अल्टो इथे स्वतःची "कॉफ्लुएंट" नावाची स्टार्ट-अप कंपनी तिने चालू केली. आज ही कंपनी अमेरिकेतील सर्वोत्तम आयटी कंपन्यांपैकी एक आहे. सन २०२० मध्ये 'फोर्ब्स' या नियतकालिकाने तिचे नाव अमेरिकेच्या सर्वोत्तम 'सेल्फ-मेड वूमेन'च्या यादीमध्ये समाविष्ट केले होते! बीबीसी मराठीने प्रसिद्ध केलेल्या एका बातमीमध्ये जगातील सर्वात श्रीमंत भारतीय महिलांच्या यादीमध्ये 'नेहा नारखेडे' ही एकमेव मराठी स्त्री होती!