रिंगण

महाराष्ट्रातल्या एका छोट्याशा गावामध्ये अर्जुन मगर नावाचा छोटा शेतकरी राहत आहे. पत्नी वारल्यामुळे केवळ तो आणि त्याचा मुलगा असे दोघेच आलेला दिवस आनंदाने जगत आहेत. खरंतर या जगण्याला आनंदी म्हणता येणार नाहीच. अर्जुनवर गावातल्या सावकाराचे कर्ज आहे. त्यासाठी त्यांनी गावातील जमीन देखील गहाण ठेवलेली आहे. एका वर्षामध्ये कर्ज परतफेड केली नाही तर सावकार जमीन देखील जप्त करणार आहे. त्यासाठी त्याला पैशांची गरज आहे. तो अनेकांकडे पैसे मागण्यासाठी जातो, पण त्याला काही पैसे मिळत नाहीत. असेच एकदा पैसे कमवण्यासाठी तो पंढरपूरमध्ये येतो. एका धर्मशाळेमध्ये थांबतो. परंतु तिथेच एक भुरटा त्याचे सर्वसामान आणि फटफटी घेऊन पसार होतो. इथून पुढेच अर्जुनचा जगण्याचा संघर्ष सुरू होतो. शिवाय त्याच्या मुलाची देखील त्याच्याबरोबर फरफट होते. एका ठिकाणी तो कामाला देखील लागतो. काहीही करून पैसे मिळवायचेच या विचाराने तो 'वेगळा' मार्ग देखील निवडतो. पण त्यातून भलतेच घडते. ही गोष्ट आहे 'रिंगण' या चित्रपटाची.
अनेक आंतरराष्ट्रीय चित्रपट महोत्सवांमध्ये तसेच ६३व्या महाराष्ट्र राज्य चित्रपट पुरस्कारांमध्ये तब्बल सहा पुरस्कार मिळवलेला हा चित्रपट आहे. अर्जुनची मध्यवर्ती भूमिका शशांक शेंडे यांनी साकारलेली आहे. जगण्याची उमेद धैर्य आणि हिम्मत यांचा अविष्कार दाखवणारा असा हा चित्रपट.